​საქართველოსა და ევროპულ სასამართლოს შორის ნაყოფიერი თანამშრომლობის საკითხები და არსებული თანამშრომლობის კიდევ უფრო გაღრმავების პერსპექტივები იყო პრემიერ-მინისტრ ირაკლი ღარიბაშვილისა და ადამიანის უფლებათა ევროპული სასამართლოს პრეზიდენტის რობერტ სპანოს შეხვედრის მთავარი განსახილველი საკითხები. პრემიერ-მინისტრმა რობერტ სპანოს საქართველოსა და მთელ მსოფლიოში ადამიანის უფლებების დაცვის კუთხით გაწეული მისი პირადი ძალისხმევისთვის მადლობა გადაუხადა.

შეხვედრაზე აღინიშნა, რომ 2022 წლის 31 მარტის მდგომარეობით, ევროსასამართლოში საქართველოს შესახებ 130- მდე საჩივარი განიხილეს, რაც ისტორიულად ყველაზე დაბალი მაჩვენებელია. 10 წლის წინ ევროსასამართლოში განხილული საჩივრების რაოდენობა 3000 – 4000 იყო. პრემიერ-მინისტრის თქმით,ევროსასამართლოს სტატისტიკური მონაცემები ეროვნულ დონეზე ადამიანის უფლებათა დაცვის მნიშვნელოვან ზრდას აჩვენებს და სტრასბურგის სასამართლოში განცხადებების რაოდენობის სწრაფი და მკვეთრი კლება საქართველოს მთავრობის მიერ ბოლო წლებში განხორციელებული წარმატებული რეფორმების შედეგია.

შეხვედრაზე ასევე ხაზი გაესვა ადამიანის უფლებათა ევროპული სასამართლოს ისტორიულ გადაწყვეტილებას, რომელმაც დაადასტურა რუსეთის მიერ საქართველოს აფხაზეთისა და ცხინვალის რეგიონების ოკუპაცია და ეფექტიანი კონტროლის განხორციელება. ირაკლი ღარიბაშვილმა კიდევ ერთხელ დაადასტურა კონფლიქტის მოგვარების მშვიდობიანი პოლიტიკის მიმართ საქართველოს მთავრობის ერთგულება.

საუბარი ასევე შეეხო მართლმსაჯულების მიმდინარე რეფორმას. პრემიერ-მინისტრმა აღნიშნა, რომ წლების განმავლობაში სასამართლოში განხორციელებული რეფორმების შედეგად მიღწეულია მნიშვნელოვანი პროგრესი, თუმცა ეს საკმარისი არ არის და რეფორმირების პროცესი გრძელდება.

ხაზი გაესვა საერთაშორისო რეიტინგებში საქართველოს წამყვან პოზიციებს. აღინიშნა, რომ World Justice Project-ის კანონის უზენაესობის ინდექსის 2021 წლის კვლევაში საქართველომ 128 ქვეყანას შორის 49-ე ადგილი დაიკავა, აღმოსავლეთ ევროპისა და ცენტრალური აზიის სხვა 14 ქვეყანასთან შედარებით კი, კანონის უზენაესობის ინდექსში საქართველო რეგიონული ლიდერია.

„ძალიან მნიშვნელოვანია, რომ მოგვეცა საქართველოში სტუმრობის შესაძლებლობა, რათა განვიხილოთ მნიშვნელოვანი მიმდინარე თანამშრომლობა და დიალოგი საქართველოს მართლმსაჯულების სისტემასა და ადამიანის უფლებათა ევროპულ სასამართლოს შორის. ყოველივე ეს ხდება ძალიან მნიშვნელოვან დროს. სასამართლოს პრეზიდენტს და ეროვნულ მოსამართლეს მიეცათ საქართველოში ჩამოსვლის შესაძლებლობა, რათა განეხილათ ბოლო დროის მოვლენები და დაედასტურებინათ საქართველოს მართლმსაჯულების სისტემისა და ხელისუფლებისთვის, რომ სასამართლო და ევროპის საბჭო განაგრძობენ წინსვლას მზარდი თანამშრომლობისა და მხარდაჭერისკენ მიმავალ გზაზე”,- განაცხადა ადამიანის უფლებათა ევროპული სასამართლოს პრეზიდენტმა რობერტ სპანომ.

მთავრობის ადმინისტრაციაში გამართულ შეხვედრას სტრასბურგის სასამართლოს მოსამართლეები ლადო ჭანტურია და ვიქტორ სოლოვეიჩიკი, საქართველოს იუსტიციის მინისტრი რატი ბრეგაძე და მთავრობის ადმინისტრაციის უფროსი რევაზ ჯაველიძე ესწრებოდნენ.

ტექნიკური მთავრობის ჩამოყალიბების იდეით მე ვერ გამოვალ. მე მინდა ვნახო პოლიტიკური პარტიების მზადყოფნა დეპოლარიზაციისთვის საჭირო ზომების მისაღებად, - ამის შესახებ ევროპარლამენტარმა, ვიოლა ფონ კრამონმა განაცხადა.

„საქართველოს ჰყავს ხელისუფლება, საქართველოს ჰყავს ხალხის მიერ არჩეული პარლამენტი. იყო დარღვევები, მაგრამ საერთო ჯამში საერთაშორისო ორგანიზაციებმა თქვეს, რომ ადგილი ჰქონდა დემოკრატიულ პროცესს. ამიტომ ტექნიკური მთავრობის ჩამოყალიბების იდეით მე ვერ გამოვალ. მე მინდა ვნახო პოლიტიკური პარტიების მზადყოფნა დეპოლარიზაციისთვის საჭირო ზომების მისაღებად“, - განაცხადა ევროპარლამენტარმა.

​ნატო-ს სამეკავშირეო ოფისის ხელმძღვანლის ალექსანდრ ვინიკოვის განცხადებით, "NATO საქართველოში წვრთნების სიხშირეს გაზრდის".

მისი თქმით, ნატო-ს მადრიდის სამიტზე მოკავშირეებმა მხარი დაუჭირეს ინდივიდუალურად მორგებული მხარდამჭერი ზომების პაკეტს საქართველოსთვის, რომელიც საქართველოს მიმართ ნატო-ს ძლიერ პოლიტიკურ მხარდაჭერას გამოხატავს. უფრო კონკრეტულად, გამოხატავს მისი სუვერენიტეტისა და ტერიტორიული მთლიანობის მიმართ მხარდაჭერას და ნატო-ს ერთგულებას ბუქარესტის სამიტის გადაწყვეტილებისადმი საქართველოს საბოლოო წევრობასთან დაკავშირებით.

„მოკავშირეებმა მხარი დაუჭირეს ზომების ერთობლიობას, ჩვენ ვეძახით მათ ინდივიდუალურად მორგებულ მხარდამჭერ ზომებს საქართველოსთვის, რომელიც არის ნატოს ერთ-ერთი პარტნიორი ქვეყანა, ყველაზე მეტად პირდაპირ დაზარალებული საგარეო საფრთხეებითა და უსაფრთხოების გარემოში ჩარევით, რაც უკრაინის წინააღმდეგ რუსეთის არაპროვოცირებულ აგრესიას უკავშირდება. ინდივიდუალურად მორგებული მხარდამჭერი ზომები საქართველოს მიმართ ნატო-ს ძლიერ პოლიტიკურ მხარდაჭერას გამოხატავს, უფრო კონკრეტულად, მისი სუვერენიტეტისა და ტერიტორიული მთლიანობის მიმართ მხარდაჭერას და ნატო-ს ერთგულებას ბუქარესტის სამიტის გადაწყვეტილებისადმი საქართველოს საბოლოო წევრობასთან დაკავშირებით.

ცალსახად, სტრატეგიულ კონცეფციაში, რომელშიც მხარდაჭერილ იქნა ასპირანტი ქვეყნების უსაფრთხოება, მათ შორის, საქართველოსი, გადაჯაჭვულია ნატო-ს მოკავშირეების უსაფრთხოებასთან. აქვე ვიტყვი, რომ სტრატეგიული კონცეფცია, ასევე, კიდევ ერთხელ ადასტურებს ნატო-ს ერთგულებას ღია კარის პოლიტიკისადმი და გადაწყვეტილებებისადმი, რომლებიც ბუქარესტის სამიტზე და მის შემდგომ სამიტებზე მიიღეს. ზომები ინდივიდუალურად მორგებულ პაკეტში გულისხმობს, როგორც პოლიტიკურ, ასევე პრაქტიკულ დახმარებას საქართველოსთვის. ეს ახალი პაკეტი შექმნილია იმისთვის, რომ დაეხმაროს საქართველოს გაზარდოს მისი შესაძლებლობები და ასევე, გააძლიეროს მისი მდგრადობა, მათ შორის საქართველოს მონაწილეობის გაზრდით ნატო-ს კიბერ წვრთნებში, დაცული კომუნიკაციების გაძლიერებაში და კრიტიკული ინფრასტრუქტურის დაცვის გაძლიერებით.

ჩვენ გავაგრძელებთ ნატო- საქართველოს არსებით პაკეტზე მუშაობას, რომელიც კვლავაც არის მთავარი ჩარჩო ჩვენი პრაქტიკული დახმარებისთვის მათ შორის ისეთ სფეროებში, როგორიც არის საჰაერო თავდაცვა, დაზვერვა, კრიზის მენეჯმენტი და კიბერთავდაცვა. ჩვენ ასევე ვფიქრობთ, რამდენიმე ახალი სამუშაო არეალის დამატებას პაკეტისთვის. ჩვენ გავზრდით წვრთნების სიხშირეს და ვეცდებით, ისინი ყოველ 2 წელში ერთხელ ჩავატაროთ სამის ნაცვლად. ჩვენ, ასევე, ვეცდებით, მეტი სინერგიის პოვნას სხვა საერთაშორისო ორგანიზაციებთან, მათ შორის, ევროკავშირთან საქართველოს დასახმარებლად. ნატო გეგმავს თანამშრომლების დამატებას ამ ოფისისთვის. მომავალი თვეების განმავლობაში საქართველოსთან მადრიდში მიღებული გადაწყვეტილებების განხორციელებაზე ვიმუშავებთ“,- განაცხადა ალექსანდრ ვინიკოვმა.

​ეუთო-ს საპარლამენტო ასამბლეაში საქართველოს პარლამენტის მუდმივმოქმედი დელეგაციის ხელმძღვანელი, საგარეო ურთიერთობათა კომიტეტის თავმჯდომარე, ნიკოლოზ სამხარაძე ეუთო-ს საპარლამენტო ასამბლეის ზაფხულის სესიაში იღებს მონაწილეობს.

სესიის ფარგლებში, ეუთო-ს საპარლამენტო ასამბლეის პოლიტიკური საქმეების და უსაფრთხოების კომიტეტზე დამტკიცდა რეზოლუცია, რომელიც ეუთო-ს რეგიონში არსებულ უსაფრთხოების გარემოს და სტაბილურობას, რუსეთის აგრესიას უკრაინაში და უსაფრთხოების სხვა გამოწვევებს ეხება.

ნიკოლოზ სამხარაძის ინიციატივით, რეზოლუციაში დაემატა ჩანაწერი, რომლის მიხედვითაც ასამბლეა მოუწოდებს რუსეთის ფედერაციას, მოახდინოს საქართველოს ოკუპირებული რეგიონების, აფხაზეთის და ცხინვალის რეგიონის დეოკუპაცია და კონსტრუქციულად ჩაერთოს ჟენევის საერთაშორისო მოლაპარაკებებში.

„საქართველო იყო პირველი ქვეყანა, რომლის ოკუპაცია მოახდინა რუსეთის ფედერაციამ, ამიტომ, მნიშვნელოვანია, რომ ჩვენი ოკუპირებული რეგიონების საკითხი მკაფიოდ იყოს ასახული ეუთო-ს პოლიტიკური კომიტეტის მიერ მიღებულ რეზოლუციაში. კომიტეტის წევრებმა გაითვალისწინეს ჩემი ინიციატივა და მხარი დაუჭირეს ამ საკითხის შესახებ რეზოლუციაში პარაგრაფის დამატებას”, – განაცხადა ნიკოლოზ სამხარაძემ.

​ეუთო-ს საპარლამენტო ასამბლეაში საქართველოს დელეგაციის ხელმძღვანელი, საგარეო ურთიერთობათა კომიტეტის თავმჯდომარე ნიკოლოზ სამხარაძე და დელეგაციის წევრი, ევროპასთან ინტეგრაციის კომიტეტის თავმჯდომარე მაკა ბოჭორიშვილი ეუთო-ს საპარლამენტო ასამბლეის ყოველწლიურ სესიაში მიიღებენ მონაწილეობას.

საქართველოს პარლამენტის ინფორმაციით, სესიის ფარგლებში დებატები პოლიტიკის, უსაფრთხოების, ეკონომიკის, გარემოს დაცვის, მეცნიერების, ტექნოლოგიების, დემოკრატიის, ადამიანის უფლებებისა და ჰუმანიტარული საკითხების შესახებ გაიმართება.

ასამბლეის წევრები, ასევე, უკრაინასა და მის გარშემო შექმნილ ვითარებაზე და ეუთო-ს სივრცეში არსებულ უსაფრთხოების სხვა გამოწვევებზე იმსჯელებენ.

საქართველოს პარლამენტის დელეგაციის წევრები, პლენარულ და კომიტეტების სხდომებში მონაწილეობის პარალელურად, ორმხრივ შეხვედრებს გამართავენ.

ეუთო-ს საპარლამენტო ასამბლეის ყოველწლიური სესია მიმდინარე წლის 2-6 ივლისს ბირმინგემში, გაერთიანებულ სამეფოში გაიმართება.

​ჩვენ გავაძლიერებთ საქართველოს მედეგობას რუსეთიდან და ნებისმიერი სხვა წყაროდან მომდინარე კიბერ-შეტევების მიმართ, – დიდი ბრიტანეთისა და ჩრდილოეთ ირლანდიის გაერთიანებული სამეფოს პრემიერ-მინისტრი ბორის ჯონსონი, საქართველოს პრემიერ-მინისტრ ირაკლი ღარიბაშვილთან შეხვედრის შესახებ „ტვიტერზე“ წერს.

როგორც ბორის ჯონსონი აღნიშნავს, დამატებით გამოყოფილი 5 მილიონი გირვანქა სტერლინგი საქართველოს დაეხმარება საერთო უსაფრთხოების კონტექსტში საფრთხეების გამოვლენასა და მათზე რეაგირებაში.

„ჩვენ გავაძლიერებთ საქართველოს მედეგობას რუსეთიდან და ნებისმიერი სხვა წყაროდან მომდინარე კიბერ-შეტევების მიმართ.

დამატებით გამოყოფილი 5 მილიონი გირვანქა სტერლინგი საქართველოს დაეხმარება ჩვენი საერთო უსაფრთხოების კონტექსტში საფრთხეების გამოვლენასა და მათზე რეაგირებაში“, – აღნიშნავს ბორის ჯონსონი.

​საქართველოს პრემიერ-მინისტრმა ირაკლი ღარიბაშვილმა დელეგაციასთან ერთად მადრიდის სამიტის ფარგლებში გამართულ ჩრდილოატლანტიკური საბჭოს სპეციალურ სხდომაში მიიღო მონაწილეობა, რომელსაც ალიანსის წევრი ქვეყნების გარდა, ფინეთის, შვედეთის, ავსტრალიის, ახალი ზელანდიის, იაპონიის, სამხრეთ კორეის ლიდერები და ევროკავშირის მაღალი დონის წარმომადგენლები ესწრებოდნენ.

საქართველოს მთავრობის ადმინისტრაციის პრეს–სამსახურის ცნობით, საბჭოს სხდომაზე განხილულ იქნა არსებული გლობალური უსაფრთხოების არქიტექტურის წინაშე წარმოქმნილი გამოწვევები და ევროატლანტიკურ სივრცეში შექმნილი უსაფრთხოების გარემო.

"ხაზი გაესვა ნატოს წევრი და პარტნიორი ქვეყნების თანამშრომლობის კიდევ უფრო მეტად გაღრმავების აუცილებლობას, რათა ერთობლივად ხელი შეეწყოს სამართლის ნორმებზე დამყარებული საერთაშორისო წესრიგის შენარჩუნებას.

სხდომაზე ასევე განიხილეს უკრაინაში განვითარებული მოვლენები. ხაზი გაესვა მიმდინარე სამხედრო აგრესიის ფონზე უკრაინის დახმარების მნიშვნელობას. საქართველოს პრემიერ-მინისტრმა ისაუბრა შავი ზღვის რეგიონში უსაფრთხოების გარემოს გაუარესებაზე და არსებულ ვითარებაში საქართველოს მიერ გადადგმულ ნაბიჯებზე.

გამოსვლისას პრემიერ-მინისტრმა აღნიშნა საქართველოსა და ნატოს შორის უკანასკნელი წლების განმავლობაში განვითარებული უპრეცედენტოდ მაღალი დონის პრაქტიკული თანამშრომლობა და იმედი გამოთქვა, რომ რეფორმების განხორციელების კუთხით ქვეყნის მიერ მიღწეული პროგრესი პოზიტიურად აისახება საქართველოს გაწევრიანებისკენ მიმავალ გზაზე.

მადრიდის სამიტზე რამდენიმე მნიშვნელოვანი დოკუმენტი მიიღეს, მათ შორის: ნატოს ახალი სტრატეგიული კონცეფცია - 2030, სამიტის კომუნიკე და „საქართველოზე მორგებული დახმარების ღონისძიებათა დოკუმენტი“.

აღსანიშნავია, რომ სამივე დოკუმენტი შეიცავს საქართველოსთვის კრიტიკულ ყველა საკითხს. კერძოდ, კონცეფციაში დადასტურებულია ბუქარესტის სამიტის გადაწყვეტილება, რომ საქართველო გახდება ნატო–ს წევრი, აღნიშნულია ნატოს ღია კარის პოლიტიკა, საქართველოს ასპირანტი ქვეყნის სტატუსი და დადასტურებულია ალიანსის ურყევი მხარდაჭერა საქართველოს სუვერენიტეტისა და ტერიტორიული მთლიანობის მიმართ. საქართველოს თემატიკა დეტალურად არის ასახული ნატოს ახალ სტრატეგიულ კონცეფციაში, რაც ალიანსისთვის მომდევნო ათი წლის განმავლობაში სახელმძღვანელო დოკუმენტი იქნება. აღსანიშნავია „საქართველოზე მორგებული დახმარების ღონისძიებათა დოკუმენტი“, რომელიც სამიტზე დაამტკიცეს და რომელიც შეიცავს საქართველოს თავდაცვითი შესაძლებლობების კიდევ უფრო განვითარებისა და ამ პროცესში ნატოს კიდევ უფრო ქმედითი ჩართულობის კონკრეტულ ღონისძიებებს", – ნათქვამია საქართველოს მთავრობის ადმინისტრაციის პრეს–სამსახურის მიერ გავრცელებულ ინფორმაციაში.

​ნატო-ს გენერალური მდივნის იენს სტოლტენბერგის განცხადებით, ნატო-ს სამიტზე პარტნიორი ქვეყნებისთვის მხარდაჭერის ახალ პაკეტებს მიიღებენ.

მისივე თქმით, პაკეტები მიღებული იქნება საქართველოსთვის, ბოსნია და ჰერცეგოვინის, მოლდოვის, ასევე მავრიტანიისა და ტუნისისთვის.

„მადრიდის ნატო-ს სამიტში საქართველო და ევროკავშირიც მიიღებენ მონაწილეობას. ჩვენ მივიღებთ მხარდაჭერის ახალ პაკეტებს პარტნიორებისთვის – საქართველოსთვის, ბოსნია და ჰერცეგოვინისა და მოლდოვის რესპუბლიკისთვის, ასევე მავრიტანიისა და ტუნისისთვის“, – განაცხადა იენს სტოლტენბერგმა.

​2014 წლის 27 ივნისს ხელი მოეწერა საქართველო-ევროკავშირის ასოცირების შესახებ შეთანხმებას, ღრმა და ყოვლისმომცველი თავისუფალი სავაჭრო სივრცის კომპონენტს. ასოცირების შეთანხმების გაფორმებამ ახალ ეტაპზე გადაიყვანა საქართველო-ევროკავშირის ურთიერთობები და დასაბამი დაუდო საქართველოს ევროკავშირთან პოლიტიკური ასოცირებისა და ეკონომიკური ინტეგრაციის პროცესს.

საქართველოში წარმოებული პროდუქციისთვის გაიხსნა 500-მილიონიანი ევროკავშირის ბაზარი, გაიზარდა საქართველო-ევროკავშირის სავაჭრო ურთიერთობები, მათ შორის, გაიზარდა საქართველოს ექსპორტი ევროკავშირის წევრ ქვეყნებში.

2016 წლის 1-ელ ივლისს კი, საქართველოსა და ევროკავშირს შორის ასოცირების შეთანხმება, მისი 431-ე მუხლის თანახმად, ძალაში შევიდა მას შემდეგ, რაც 23 მაისს, ევროკავშირის საგარეო საქმეთა საბჭომ მიიღო გადაწყვეტილება რატიფიკაციის პროცედურების დასრულების თაობაზე.

რატიფიკაციის პროცესი ორ წელზე ნაკლები დროის განმავლობაში გაგრძელდა და მასში მონაწილეობდნენ ევროპარლამენტი, ევროკავშირის 28 წევრი ქვეყნისა და საქართველოს საკანონმდებლო ორგანოები. შეთანხმების უპრეცედენტოდ მოკლე ვადებში რატიფიკაცია ცალსახად წარმოადგენს ევროკავშირის წევრი ქვეყნების მხრიდან საქართველოს ევროპული გზის მტკიცე მხარდაჭერას.

2016 წლის 1-ლი ივლისიდან ასოცირების შეთანხმება უკვე ოფიციალურად გახდა ევროკავშირთან სრულიად ახალი, მაღალი დონის თანამშრომლობის განმსაზღვრელი ძირითადი სამართლებრივი ჩარჩო. ამ დღეს, ოფიციალურად ამოქმედდა ხელშეკრულების ყველა დებულება და საქართველოს პოლიტიკური ასოცირებისა და ეკონომიკური ინტეგრაციის პროცესი, რომელიც ევროპული პოლიტიკური, სავაჭრო-ეკონომიკური, სოციალური და სამართლებრივი სტანდარტების დანერგვას გულისხმობს, შეუქცევადად და სრულმასშტაბიანად წარიმართა.

​აშშ-ში საქართველოს ელჩი დავით ზალკალიანი, აშშ-ს პრეზიდენტს,  – ჯო ბაიდენს შეხვდა.

“ამერიკის შეერთებული შტატების პრეზიდენტ ჯოზეფ ბაიდენს რწმუნებათა სიგელები გადავეცი.

რწმუნებათა სიგელების გადაცემის ცერემონიის ფარგლებში შედგა ხანმოკლე შეხვედრა ელჩსა და პრეზიდენტს შორის. დავით ზალკალიანმა პრეზიდენტს მიაწოდა ინფორმაცია საქართველოს წინაშე არსებული გამოწვევების შესახებ და დაუდასტურა, რომ საქართველო აშშ-ის სანდო და ერთგული პარტნიორია რეგიონში. ელჩმა ასევე მადლობა გადაუხადა პრეზიდენტს მისი პირადი მხარდაჭერისთვის საქართველოს დასავლური მისწრაფებების მიმართ და აღნიშნა, რომ ამ კრიტიკულ სიტუაციაში ძალზედ მნიშვნელოვანია აშშ-ის ურყევი მხარდაჭერა საქართველოს ტერიტორიული მთლიანობის, სუვერენიტეტისა და ევრო ატლანტიკური ინტეგრაციის მიმართ.

პრეზიდენტმა ბაიდენმა აღნიშნა, რომ მას კარგად ესმის ჩვენი ქვეყნის წინაშე არსებული გამოწვევები, მხარს უჭერს ჩვენი ქვეყნის სუვერენიტეტსა და ტერიტორიულ მთლიანობას და დასავლურ მისწრაფებებს.”

​შეერთებული შტატები მზადაა, მხარი დაუჭიროს ქართველი ხალხის აშკარა სურვილს და ხელი შეუწყოს რეფორმების განხორციელებას საქართველოს ევროატლანტიკური ინტეგრაციის გზაზე, – ამის შესახებ საქართველოში აშშ-ის ელჩმა განაცხადა.

კელი დეგნანი ვაშინგტონში იმყოფება, სადაც მაღალი რანგის ლიდერებთან შეხვედრებს მართავს.

„მოგესალმებით ვაშინგტონიდან. აქ მაღალი რანგის ლიდერებთან შეხვედრები მაქვს მისიის ხელმძღვანელთა ყოველწლიურ კონფერენციაზე, რომელიც მთელი მსოფლიოდან თავს უყრის აშშ-ის ელჩებს (მათ შორის, ნაცნობ სახეებსაც შეამჩნევდით).

ვაშინგტონში, ისევე – როგორც თბილისში, ნათელია, რომ შეერთებული შტატები მზადაა, მხარი დაუჭიროს ქართველი ხალხის აშკარა სურვილს და ხელი შეუწყოს რეფორმების განხორციელებას საქართველოს ევროატლანტიკური ინტეგრაციის გზაზე“, – აღნიშნულია კელი დეგნანის განცხადებაში.

​ვფიქრობ, რომ ეს იყო ძალიან დროული და ძალიან მკაფიო მხარდაჭერა, - ამის შესახებ ამერიკის შეერთებულ შტატებში საქართველოს ელჩმა, დავით ზალკალიანმა „ქრონიკასთან“ ჰელსინკის კომისიის მოწოდებასთან დაკავშირებით განაცხადა.

„მე ჩამოსვლის პირველივე დღიდანვე მქონდა შეხვედრები ჰელსკინკის კომისიის წევრებთან, სენატორ კარდენთან და ასევე კომისიის სხვა წევრებთან და ბუნებრივია, ჩემი შეხვედრების ერთ-ერთი მთავარი თემა აშშ-საქართველოს შორის სტრატეგიული პარტნიორობის ძირითად მიმართულებებთან ერთად იყო ამერიკის მხარდაჭერა ჩვენი ევროპული და ევროატლანტიკური კურსის. ძალიან მიხარია, რომ ამან შედეგი გამოიღო და ჩვენ ვიხილეთ ჰელსკინკის კომისკიის უაღრესად მკაფიო მხარდაჭერი გზავნილი“, - განაცხადა ზალკალიანმა

აშშ-ის ჰელსინკის კომისია ევროპულ საბჭოს მოუწოდებს, უკრაინასთან და მოლდოვასთან ერთად, კანდიდატის სტატუსი საქართველოსაც მიანიჭოს

​ევროკავშირის ლიდერებმა უნდა აღასრულონ თავიანთი ისტორიული პასუხისმგებლობა და მისცენ მკაფიო პოლიტიკური სიგნალი უკრაინას, მოლდოვასა და საქართველოს, რაც დაადასტურებს მათ ევროპულ პერსპექტივას, - ნათქვამია ევროპარლამენტის რეზოლუციაში, რომელიც ცოტა ხნის წინ მიიღეს.

ევროპარლამენტის მიერ გავრცელებულ პრესრელიზში გამოყოფილია მნიშვნელოვანი გზავნილები, რასაც რეზოლუცია მოიცავს:

აუცილებელი რეფორმების დასრულების შემდეგ საქართველოც უნდა გახდეს კანდიდატი;

არ არსებობს "სწრაფი გზა" ევროკავშირის წევრობისკენ; გაწევრიანება მხოლოდ დამსახურების საფუძველზე და კრიტერიუმების შესრულების შემდეგ;

ევროკავშირის გაფართოება ევროკავშირის ინტერესებშია.

რეზოლუციას 529 ევროპარლამენტარმა დაუჭირა, 45 - წინააღმდეგ წავიდა, 14-მა კი თავი შეიკავა.

ევროპარლამენტარები ამ რეზოლუციით მოუწოდებენ ევროკავშირის წევრი ქვეყნების ლიდერებს, დაუყოვნებლივ მიანიჭონ კანდიდატის სტატუსი უკრაინასა და მოლდოვას.

"იგივე ნაბიჯები უნდა გადაიდგას საქართველოსთან მიმართებაშიც მას შემდეგ, რაც მისი მთავრობა შეასრულებს ევროკომისიის მიერ გამოყოფილ პრიორიტეტებს", - ნათქვამია რეზოლუციაში.

ევროპარლამენტი მოუწოდებს უკრაინის, მოლდოვისა და საქართველოს ხელისუფლებებს, "ცალსახად წარმოაჩინონ თავიანთი პოლიტიკური გადაწყვეტილება მათი ხალხის ევროპული ამბიციების განსახორციელებლად", დააჩქარონ რეფორმები, რათა რაც შეიძლება მალე შესრულდეს ევროკავშირში გაწევრიანების კრიტერიუმები.

"უკრაინელები, მოლდოველები და ქართველები იმსახურებენ ცხოვრებას თავისუფალ, დემოკრატიულ და აყვავებულ ქვეყნებში, რომლებიც ევროპული ოჯახის ამაყი და ერთგული წევრები არიან", - აცხადებენ ევროპარლამენტარები და მოუწოდებენ ევროპულ საბჭოს, გადადგას პირველი მნიშვნელოვანი ნაბიჯი ამ სამი ქვეყნის მოქალაქეების ლეგიტიმური მისწრაფებების რეალიზაციისკენ.

რეზოლუციაში ხაზგასმულია, რომ გაფართოებას ალტერნატივა არ აქვს, რაც "როგორც არასდროს გეოსტრატეგიული ინვესტიციაა სტაბილურ, ძლიერ და ერთიან ევროკავშირში".

"ევროკავშირის სრულუფლებიანი წევრობის პერსპექტივა იმ ქვეყნებისთვის, რომლებიც მიისწრაფვიან გახდნენ წევრი ქვეყნები, არის ევროკავშირის საკუთარ პოლიტიკურ, ეკონომიკურ და უსაფრთხოების ინტერესებში", - ნათქვამია რეზოლუციაში.

ევროპარლამენტარები ასევე ითხოვენ გაფართოების პროცესის ხელახლა გააქტიურებას დასავლეთ ბალკანების ქვეყნებთან მიმართებაში.

23-24 ივნისს ბრიუსელში გაიმართება ევროკავშირის წევრი ქვეყნების ლიდერთა სამიტი, სადაც უნდა მიიღონ გადაწყვეტილება უკრაინის, მოლდოვისა და საქართველოსთვის წევრობის კანდიდატის სტატუსის მინიჭების თაობაზე.

17 ივნისს ევროკომისიამ გამოსცა რეკომენდაცია და ევროპულ საბჭოს მოუწოდა, კანდიდატის სტატუსი მიანიჭოს მოლდოვასა და უკრაინას, ხოლო საქართველოს - ევროპული პერსპექტივა. ამასთან, საქართველომ კანდიდატის სტატუსის მისაღებად პირობები უნდა დააკმაყოფილოს.

​ახლა დროა ვაღიაროთ, რომ უკრაინის, მოლდოვისა და საქართველოს მომავალი ევროკავშირის ფარგლებშია, - განაცხადა ევროპული საბჭოს პრეზიდენტმა, შარლ მიშელმა.

„ახლა დროა ვაღიაროთ, რომ უკრაინის, მოლდოვისა და საქართველოს მომავალი ევროკავშირის ფარგლებშია.

გიწვევთ [ევროკავშირის წევრ სახელმწიფოებს] უკრაინისა და მოლდოვასთვის კანდიდატის სტატუსის მისანიჭებლად.

პარალელურად, ჩვენ გავაგრძელებთ უკრაინის ძლიერ მხარდაჭერას ჰუმანიტარული, სამხედრო, ეკონომიკური და ფინანსური კუთხით“, - აღნიშნა შარლ მიშელმა.

​ეს [ევროკომისიის] მოსაზრება არის დიდი წინგადადგმული ნაბიჯი საქართველოსთვის ევროპულ გზაზე. რამდენიმე კვირის წინ არავინ ელოდა ევროკომისიის მოსაზრებებს. ახლა საქართველოს აქვს პროგრამა, რომელიც უნდა შეასრულოს. საქართველო ახლა აქვს განრიგი. საქართველოს ევროპული გზა ახლა იდეალურადაა მონიშნული. მოდით ვიმუშაოთ, - ამის შესახებ საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჟოზეფ ბორელმა განაცხადა.

მან ჟურნალისტებთან კომენტარი გააკეთა უკრაინის საკითხზეც.

„ჩვენ განვაგრძობთ უკრაინის საზოგადოების მხარდაჭერას, რათა გამოვიყენოთ ეს შესაძლებლობა. მათი მოტყუება არ შეიძლება, პირიქით, უნდა გავამხნეოთ. მათ აქვთ პოზიტიური რეკომენდაცია, რომელიც მომავალ წევრობაზე საუბრობს გარკვეული პირობების გათვალისწინებით. ეს არის ძალიან დიდი წინგადადგმული ნაბიჯი. მოდი გამოვიყენოთ ეს შესაძლებლობა და ვიმუშაოთ“, - განაცხადა ბორელმა.

​საქართველოს მიმართ აშშ-ის მტკიცე მხარდაჭერა, ორი ქვეყნის სტრატეგიული პარტნიორობა და ევროპულ და ევროატლანტიკურ სტრუქტურებში ინტეგრაცია იყო საქართველოს პრემიერ-მინისტრის ირაკლი ღარიბაშვილისა და ევროპისა და ევრაზიის საკითხებში აშშ-ის სახელმწიფო მდივნის თანაშემწის კარენ დონფრიდის შეხვედრის მთავარი განსახილველი საკითხები.

მთავრობის მეთაურმა აღნიშნა, რომ სახელმწიფო მდივნის თანაშემწის ვიზიტი კიდევ ერთი მკაფიო გზავნილია აშშ-ის მხრიდან საქართველოს ურყევი მხარდაჭერისა და ქვეყანა ამას განსაკუთრებულად აფასებს. მისივე თქმით, საქართველო არის და რჩება აშშ-ის ყველაზე საიმედო და ერთგულ მოკავშირედ როგორც რეგიონში, ისე მის ფარგლებს გარეთ.

ყურადღება დაეთმო საქართველო – აშშ-ის სტრატეგიული პარტნიორობის კიდევ უფრო მეტად გაძლიერების მნიშვნელობას, მათ შორის, საქართველო – აშშ-ის მაღალი დონის პოლიტიკური დიალოგის გააქტიურების, აგრეთვე თავდაცვისა და უსაფრთხოების, სავაჭრო-ეკონომიკური და საინვესტიციო მიმართულებებით.

პრემიერთან შეხვედრისას კიდევ ერთხელ აღინიშნა აშშ-ის ურყევი და მტკიცე მხარდაჭერა საქართველოს ტერიტორიული მთლიანობისა და სუვერენიტეტისადმი, ისევე როგორც ევროპული და ევროატლანტიკური მისწრაფებებისადმი.მთავრობის მეთაურის განცხადებით, საქართველოს მთავრობისა და ქართველი ხალხის ნება, რომ მოხდეს ქვეყნის ინტეგრაცია ევროპულ და ევროატლანტიკურ სტრუქტურებში, ურყევია.

ამასთან, მხარეებმა განიხილეს უკრაინაში მიმდინარე საომარი მოქმედებები.საუბარი შეეხო რეგიონში არსებულ ვითარებას და საქართველოს უმნიშვნელოვანეს როლს რეგიონში მშვიდობისა და სტაბილურობის უზრუნველყოფაში.

მთავრობის ადმინისტრაციაში გამართულ შეხვედრას აშშ-ის მხრიდან – საგანგებო და სრულუფლებიანი ელჩი კელი დეგნანი, ხოლო საქართველოს მხრიდან – საგარეო საქმეთა მინისტრი ილია დარჩიაშვილი და მთავრობის ადმინისტრაციის უფროსი რევაზ ჯაველიძე ესწრებოდნენ.

ინფორმაციას პრემიერ-მინისტრის პრესსამსახური ავრცელებს.

​ევროკომისიის პრეზიდენტმა ურსულ ფონ დერ ლაიენმა, ბრიუსელში გამართულ პრესკონფერენციაზე, განაცხადა, რომ კანდიდატის სტატუსის მინიჭებამდე, უნდა შეფასდეს თუ როგორ აკმაყოფილებს საქართველო პირობებს.

ამასთან, ურსულ ფონ დერ ლაიენმა მოუწოდა ევროპულ საბჭოს, საქართველოს ევროპული პერსპექტივა მიანიჭოს.

"საქართველო იზიარებს იმავე მისწრაფებებსა და პოტენციალს, რაც უკრაინასა და მოლდოვას აქვს. მის განაცხადს აქვს ძლიერი მხარეები, როგორიცაა ეკონომიკის საბაზრო ორიენტაცია და ძლიერი კერძო სექტორი. წარმატების მისაღწევად ქვეყანა პოლიტიკურად უნდა გაერთიანდეს და დასახოს მკაფიო გზა სტრუქტურული რეფორმების განსახორციელებლად ევროკავშირისკენ მიმავალ გზაზე. გზა, რომელიც კონკრეტულად დასახავს აუცილებელ რეფორმებს, სადაც ჩართული იქნება სამოქალაქო საზოგადოება და რომელიც ფართო პოლიტიკური მხარდაჭერით სარგებლობს. ჩვენ რეკომენდაციას ვაძლევთ საბჭოს, საქართველოს მიენიჭოს ევროპული პერსპექტივა, შეაფასოს, როგორ ასრულებს პირობებს, ვიდრე მივანიჭებთ ამათ კანდიდატის სტატუსს", - განაცხადა ევროკომისიის პრეზიდენტმა.

​ნატოს თავდაცვის მინისტერიალის ფარგლებში, ბრიუსელში ვიზიტით მყოფი საქართველოს თავდაცვის მინისტრი ჯუანშერ ბურჭულაძე ნატოს გენერალურ მდივანს იენს სტოლტენბერგს შეხვდა, – ამის შესახებ ინფორმაციას თავდაცვის სამინისტრო ავრცელებს.

მათივე ცნობით, საქართველოს თავდაცვის მინისტრმა ნატოს გენერალურ მდივანს მადლობა გადაუხადა ნატოში გაწევრიანების გზაზე საქართველოსთვის გაწეული მტკიცე პოლიტიკური და პრაქტიკული მხარდაჭერისთვის.

მხარეებმა რეგიონში არსებულ უსაფრთხოების გარემოსა და გამოწვევებზე ისაუბრეს. ამ მიმართულებით განსაკუთრებული ყურადღება დაეთმო რუსეთის მიერ წარმოებულ ომს უკრაინაში. მხარეებმა დაადასტურეს ურყევი მხარდაჭერა და სოლიდარობა უკრაინისა და უკრაინელი ხალხის მიმართ. რუსეთიდან მომდინარე საფრთხეების გათვალისწინებით, შეხვედრისას ხაზგასმით აღინიშნა ნატო-საქართველოს პრაქტიკული თანამშრომლობის გაღრმავების მნიშვნელობა, აღნიშნულ საფრთხეებთან მიმართებით საქართველოს მდგრადობისა და თავდაცვისუნარიანობის განმტკიცების, ნატოსთან თავსებადობის გაძლიერებისა და ქვეყნის ალიანსში გაწევრიანების მიზნით. ყურადღება დაეთმო „საჭიროებებზე მორგებული მხარდაჭერის დოკუმენტის“ (Tailored Support Document) განხილვას, რომელიც მორგებულია თავდაცვის სფეროში პრიორიტეტული მიმართულებების განვითარებაზე.

მხარეებმა ისაუბრეს ნატო-საქართველოს არსებითი პაკეტის ფარგლებში პრაქტიკული დახმარებისა და შავი ზღვის უსაფრთხოების გაძლიერების კუთხით ალიანსის ჩართულობის გაზრდის მნიშვნელობაზეც. ნატოს გენერალურმა მდივანმა დადებითად შეაფასა საქართველოს თავდაცვის რეფორმები და ნატოსთან პრაქტიკული თანამშრომლობის ფარგლებში მიღწეული პროგრესი და კიდევ ერთხელ დაადასტურა საქართველოსთვის მხარდაჭერის გაძლიერებისთვის მზადყოფნა, მათ შორის ჰიბრიდული გამოწვევების წინააღმდეგ და კიბერუსაფრთხოების შესაძლებლობების კიდევ უფრო გაუმჯობესებისთვის. შეხვედრაზე დადასტურდა ნატოს მტკიცე მხარდაჭერა საქართველოს სუვერენიტეტის, ტერიტორიული მთლიანობისა და ევროატლანტიკური მისწრაფებების მიმართ. შეხვედრის დასასრულს, მხარეებმა ხაზი გაუსვეს მოახლოებული ნატო-ს მადრიდის სამიტის განსაკუთრებულ მნიშვნელობას, არსებული უსაფრთხოების გარემოს გათვალისწინებით. ნატო-ს თავდაცვის მინისტერიალის ფარგლებში, საქართველოს თავდაცვის მინისტრმა ორმხრივი შეხვედრები გამართა, ნატოს წევრი და პარტნიორი სახელმწიფოების წარმომადგენლებთან.

​ბრიუსელში მიმდინარე ნატოს თავდაცვის მინისტერიალის ფარგლებში საქართველოს თავდაცვის მინისტრმა ფინელ და შვედ კოლეგებთან ორმხრივი შეხვედრები გამართა.

ამის შესახებ ინფორმაციას საქართველოს თავდაცვის სამინისტრო ავრცელებს.

"ჯუანშერ ბურჭულაძემ ანტი კაიკონენთან და პიტერ ჰულქვისტთან საუბრისას ყურადღება უსაფრთხოების გარემოსა და საერთო გამოწვევაზე გაამახვილა. აღინიშნა, რომ უკრაინაში მიმდინარე საომარი მოქმედებები და გართულებული უსაფრთხოების გარემო მნიშვნელოვნად ზრდის საფრთხეს და რისკს საქართველოსა და სამხრეთ კავკასიის რეგიონისთვის. ამ კონტექსტში ჯუანშერ ბურჭულაძემ დასავლეთის ჩართულობის მნიშვნელობაზე გაამახვილა ყურადღება, როგორც რეგიონში მშვიდობის, სტაბილურობისა და სწრაფი ეკონომიკური განვითარების მთავარი ფაქტორი და აღნიშნა, რომ ამ კუთხით კრიტიკული მნიშვნელობა აქვს ფინეთისა და შვედეთის ძლიერ მხარდაჭერას.

ორმხრივ შეხვედრებზე კოლეგებმა ქვეყნების ნატოში ინტეგრაციის გზაზე გადადგმულ ნაბიჯებზე ისაუბრეს და ამ მიზნით უწყებებში გატარებული რეფორმები ერთმანეთს გაუზიარეს. ჯუანშერ ბურჭულაძემ კოლეგებს ნატო-საქართველოს არსებითი პაკეტის (SNGP) პირველი წარმატებული პროექტის - ნატო-საქართველოს წვრთნებისა და შეფასების ერთობლივ (JTEC) ცენტრში ფინელი და შვედი მაღალკვალიფიცირებული ექსპერტების მოვლინებისთვის მადლობა გადაუხადა. კოლეგებმა თავდაცვის სფეროში ორმხრივი თანამშრომლობის საკითხებიც მიმოიხილეს და მომავალში თანამშრომლობის გაღრმავების სურვილი გამოთქვეს.

ბელგიის სამეფოში მიმდინარე ნატოს თავდაცვის მინისტრების შეხვედრის ფარგლებში დაგეგმილია ჯუანშერ ბურჭულაძის შეხვედრები ნატოს გენერალურ მდივანთან იენს სტოლტენბერგთან, ასევე თურქ, ბულგარელ, ჰოლანდიელ, გერმანელ და ლიეტუველ კოლეგებთან"-ნათქვამია ინფორმაციაში.

​საქართველოს პარლამენტის თავმჯდომარე შალვა პაპუაშვილი დანიის სამეფოს პარლამენტის თავმჯდომარეს, ჰენრიკ დემს შეხვდა.

საქართველოს პარლამენტის პრესსამსახურის ინფორმაციით, მხარეებმა საქართველოსა და დანიის სამეფოს შორის არსებული ორმხრივი და მრავალმხრივი თანამშრომლობა მიმოიხილეს. მათივე ცნობით, ხაზი გაესვა საპარლამენტო კავშირების გაღრმავების მნიშვნელობას.

შალვა პაპუაშვილმა, ასევე ქვეყნებს შორის თანამშრომლობაზე გაამახვილა ყურადღება და მადლიერება გამოხატა დანიის სამეფოს მიერ საქართველოში დემოკრატიისა და სახელმწიფო ინსტიტუტების მშენებლობის პროცესში შეტანილი წვლილისათვის.

პარლამენტის თავმჯდომარე მიესალმა დანიის სამეფოს გადაწყვეტილებას საქართველოში საელჩოს გახსნის თაობაზე. მისი თქმით, აღნიშნული ნაბიჯი მნიშვნელოვნად შეუწყობს ხელს ორ ქვეყანას შორის თანამშრომლობის გაღრმავებას.

„საქართველოს პარლამენტის თავმჯდომარემ ევროპული ინტეგრაციის გზაზე საქართველოს მიერ წინ გადადგმულ ნაბიჯებსა და განხორციელებულ რეფორმებზე დეტალურად ისაუბრა. შალვა პაპუაშვილმა იმედი გამოთქვა, რომ დანიის სამეფო მხარს დაუჭერს საქართველოსთვის, უკრაინისა და მოლდოვისთვის კანდიდატის სტატუსის მინიჭებას. ასევე, შეხვედრაზე საუბარი შეეხო უკრაინაში რუსულ აგრესიას და მის შედეგებს.

საქართველოს პარლამენტის თავმჯდომარის ოფიციალური ვიზიტი სკანდინავიის ქვეყნებში გრძელდება. საპარლამენტო დელეგაციაში დეპუტატები: ნიკოლოზ სამხარაძე, მაკა ბოჭორიშვილი, მაია ბითაძე და ჰერმან საბო შედიან.

​საქართველოს პარლამენტის თავმჯდომარე შალვა პაპუაშვილი ნორვეგიის სამეფოს პარლამენტის - სტორტინგის პრეზიდენტს, მასუდ გარახანის შეხვდა, - ამის შესახებ ინფორმაციას საქართველოს პარლამენტის პრესსამსახური ავრცელებს.

მათივე ინფორმაციით, მხარეებმა საქართველოსა და ნორვეგიის სამეფოს შორის არსებული თანამშრომლობა მიმოიხილეს. ყურადღება გამახვილდა საპარლამენტო კავშირების გაძლიერების მნიშვნელობაზე.

შალვა პაპუაშვილი მასუდ გარახანის საქართველოს ევროატლანტიკურ მისწრაფებებზე ესაუბრა და აღნიშნა, რომ ახალი გეოპოლიტიკური რეალობის გათვალისწინებით, განსაკუთრებით მნიშვნელოვანია, მადრიდის სამიტზე ნატომ სწორი სიგნალი გამოაგზავნოს საქართველოსკენ და ალიანსში გაწევრიანების რეალური გზა შესთავაზოს. მისივე შეფასებით, საქართველოს ეს მხარდაჭერა ნორვეგიის მხრიდან აქვს.

საქართველოს პარლამენტის თავმჯდომარემ, ასევე, მიმოიხილა საქართველოს თანამშრომლობა ჩრდილოატლანტიკურ ალიანსთან და ხაზი გაუსვა იმ დახმარებას, რომელსაც ნორვეგიის სამეფო ამ მხრივ ჩვენს ქვეყანას უწევს.

მასუდ გარახანიმ აღნიშნა, რომ ნორვეგიის სამეფო გააგრძელებს საქართველოს ტერიტორიული მთლიანობისა და ევროატლანტიკური ინტეგრაციის მხარდაჭერას.

​„შეხვედრაზე საუბარი იყო ყველა მიმდინარე აქტუალურ თემასთან დაკავშირებით, რომელიც შეიძლება, იყოს ორმხრივი ინტერესის საგანი, მათ შორის, მეტწილად, პოლიტიკურ პროცესებში პოლარიზების ხარისხზე, როგორც ხელისშემშლელ ფაქტორზე დემოკრატიული პროცესების განვითარებაში”, – ამის შესახებ ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, მიხეილ სარჯველაძემ საქართველოს პარლამენტის თავმჯდომარე შალვა პაპუაშვილსა და დემოკრატიის, ადამიანის უფლებებისა და შრომის საკითხებში აშშ-ის სახელმწიფო მდივნის თანაშემწის მოადგილეს, კარა მაკდონალდს შორის გამართული შეხვედრის შემდეგ განაცხადა.

„ხაზი გაესვა, რომ ეს არის, უმრავლეს შემთხვევაში, შემაფერხებელი ჩვენს ქვეყანაში ნორმალური დემოკრატიული პროცესების განვითარებისთვის. აღინიშნა იმის შესახებაც, რომ ეს არ არის პრობლემა, რომელიც ამ შემთხვევაში შეიძლება, ხელისუფლებისგან მომდინარეობდეს, არავითარი ინტერესი ხელისუფლებას ასეთი ვითარების და გარემოს შექმნისა არ აქვს და ეს ხშირ შემთხვევაში, შეიძლება იყოს ოპოზიციის რადიკალური ფრთის ინტერესში”, – განაცხადა მიხეილ სარჯველაძემ.

​„საქართველო რუსეთის წინააღმდეგ მნიშვნელოვანი მოკავშირე და საყრდენია“, – ამის შესახებ კონგრესმენი, ადამ კინზინგერი აშშ-ში საქართველოს ელჩ დავით ზალკალიანთან შეხვედრის შემდეგ „ტვიტერში“ წერს.

ზალკალიანმა და კინზინგერმა ქართულ-ამერიკულ ურთიერთობებსა და უკრაინაში მიმდინარე ომის შესახებ ისაუბრეს.

„მქონდა შეხვედრა საქართველოს ახალ ელჩთან ამერიკაში, დავით ზალკალიანთან. ბევრია განსახილველი, თუმცა, განსაკუთრებით განვიხილეთ რუსეთის არაპროვოცირებული ომი უკრაინაში. საქართველო რუსეთის წინააღმდეგ მნიშვნელოვანი მოკავშირე და საყრდენია“, – წერს კინზინგერი.

​საქართველოს პარლამენტის თავმჯდომარის პირველი მოადგილე გიორგი ვოლსკი ნატოს სამეკავშირეო ოფისის ხელმძღვანელს საქართველოში ალექსანდრე ვინიკოვს შეხვდა, - ამის შესახებ ინფორმაციას პარლამენტის პრესსამსახური ავრცელებს.

მათივე ცნობით, საუბარი საქართველოს პარლამენტსა და ნატო-ს წარმომადგენლობას შორის თანამშრომლობას, ასევე, ოკუპირებულ ტერიტორიებზე არსებულ ვითარებას შეეხო.

„შეხვედრაზე განვიხილეთ ნატოს წარმომადგენლობასა და საქართველოს პარლამენტს შორის თანამშრომლობის გარკვეული ასპექტები, ოკუპირებულ ტერიტორიებზე არსებული ვითარება, ამასთან დაკავშირებით ჩვენი ხედვები და პერსპექტივები რუსეთის აგრესიის ფონზე, რომელიც არა მარტო უკრაინაში, არამედ საქართველოშიც საკმაოდ სერიოზულად იჩენს თავს და დესტაბილიზაციის ფაქტორს წარმოადგენს. შევაფასეთ საფრთხეები და შევთანხმდით მომავალი თანამშრომლობის ფორმატზე“, - განაცხადა გიორგი ვოლსკიმ შეხვედრის შემდეგ.

​„ჩვენს ურთიერთობებს ამყარებს მთელი რიგი მასშტაბური და წარმატებული რეფორმები. საქართველოს რეფორმებმა და მიღწევებმა კორუფციასთან ბრძოლის, ბიზნესის კეთების პრაქტიკის გაუმჯობესების, საბაჟო და სახელმწიფო მომსახურებების ფუნდამენტური განახლების და ა.შ. კუთხით, მთელი მსოფლიოს მასშტაბით, მათ შორის, ევროკავშირისა და მისი წევრი ქვეყნების დადებითი შეფასება“, – ამის შესახებ საქართველოს პარლამენტის თავმჯდომარის მიმართვაშია ნათქვამი, რომელსაც შალვა პაპუაშვილი ევროპული პარლამენტის პრეზიდენტ რობერტა მეცოლას უგზავნის.

პარლამენტის თავმჯდომარე ყურადღებას ამახვილებს იმ ფაქტზე, რომ აღნიშნული მიღწევები რუსეთის აგრესიული ქმედებებისა და საქართველოს ტერიტორიების ოკუპაციის ფონზე ხორციელდებოდა.

„საქართველო 2017 წლიდან არის ევროპული ენერგეტიკული გაერთიანების სრულუფლებიანი წევრი; 2017 წლიდან აქვს უვიზო მიმოსვლა შენგენის სივრცეში; 2014 წელს ხელი მოაწერა ასოცირების შეთანხმებას, ღრმა და ყოვლისმომცველი თავისუფალი სავაჭრო სივრცის ჩათვლით და მას შემდეგ განახორციელა აღნიშნული შეთანხმების 45 პროცენტი. ევროკავშირის წევრობის ყველაზე ახლო ასპირანტ ქვეყნებთან, მოლდოვასა და უკრაინასთან შედარებით, საქართველო მოწინავეა ასოცირების შეთანხმების სამივე კომპონენტში – პოლიტიკური დიალოგი, ღრმა და ყოვლისმომცველი თავისუფალი ვაჭრობის შესახებ შეთანხმება და სექტორული/ეკონომიკური თანამშრომლობა. უნდა გვახსოვდეს, რომ აღნიშნული მიღწევები ხორციელდებოდა რუსეთის რეალური აგრესიული ქმედებებისა და საქართველოს ტერიტორიების ოკუპაციის, აგრეთვე, იმ მუდმივი საფრთხის ფონზე, რაც ყველასთვის აშკარა გახდა უკრაინის წინააღმდეგ რუსეთის უპრეცედენტოდ სასტიკი აგრესიის შემდეგ. საქართველოს მიღწევები და რაც უფრო მნიშვნელოვანია, მომავალი წარმატებები, საქართველოს ევროკავშირის სასურველ პერსპექტიულ წევრად ხდის, განსაკუთრებით, ევროკავშირის მშვიდობისა და უსაფრთხოების პოლიტიკის, ენერგოდამოუკიდებლობის, თავისუფალი ბაზრების გაფართოების და ბოლოს, კულტურული მრავალფეროვნების მიმართულებებით“, – ნათქვამია მიმართვაში.
შალვა პაპუაშვილის შეფასებით, გამოწვევები რჩება, თუმცა, ქვეყნის განვითარების მიმართულება ცხადად წარმოაჩენს პროგრესის სურვილს, გაუმჯობესების შესაძლებლობასა და უპირველეს ყოვლისა, ევროკავშირის გამდიდრებისა და გაძლიერების პოტენციალს.