გაერო: იძულებით გადაადგილებულ პირთა რაოდენობამ 100 მილიონს გადააჭარბა

​გაეროს ინფორმაციით, იმ ადამიანთა რაოდენობამ, რომლებიც იძულებულები გახდნენ გაექცნენ კონფლიქტებს, ძალადობას, ადამიანის უფლებათა დარღვევასა და დევნას ისტორიაში პირველად 100 მილიონს გადააჭარბა. ამის შესახებ BBC ლტოლვილთა საკითხებში გაეროს უმაღლესი კომისარის (UNHCR), ფილიპო გრანდის განცხადებაზე დაყრდნობით წერს.

გამოცემის ინფორმაციით, გრანდი აღნიშნავს, რომ ამას ხელი შეუწყო უკრაინაში მიმდინარე ომმა და სხვა კონფლიქტებმა. „ეს არის რეკორდი, რომელიც არასოდეს უნდა დამყარებულიყო. ჩვენთვის ეს გამომაფხიზლებელი ზარი უნდა გახდეს, რათა მოვაგვაროთ და თავიდან ავიცილოთ დამანგრეველი კონფლიქტები, დავასრულოთ დევნა და ყველა ის მიზეზი, რომელიც უდანაშაულო ადამიანებს აიძულებს საკუთარი სახლები დატოვოს“, - გაანაცხადა გრანდიმ.

UNHCR-ის ცნობით, უკრაინაში ომის დაწყების შემდეგ ქვეყანაში 8 მილიონი იძულებით გადაადგილებული ადამიანი დაფიქსირდა, 6 მილიონი კი ქვეყნიდან გავიდა.

გაეროს შარშანდელი მონაცემებით, მსოფლიოში იძულებით გადაადგილებულ პირთა რაოდენობა 90 მილიონს შეადგენდა.

გაზიარება