ასოცირების დღის წესრიგით გაწერილი ნაბიჯების გადადგმა ჩვენი ვალდებულებაა

„ასოცირების დღის წესრიგი არსებობს, ეს არის სახელმძღვანელო დოკუმენტი, რომელშიც გაწერილია ჩვენ მიერ გადასადგმელი ყველა ნაბიჯი, მათ შორის, რეფორმები, რომლებიც სხვადასხვა სფეროში უნდა გატარდეს. ყოველგვარი კითხვარისგან დამოუკიდებლად, ჩვენთვის ეს არის ვალდებულება, რომელზეც ჩვენ ევროკავშირთან შევჯერდით და თვეებია, ამასთან დაკავშირებით კონსულტაციები მიმდინარეობდა. კითხვარი ამისგან დამოუკიდებელი საკითხია“, - განაცხადა „ქართული ოცნების“ თავმჯდომარემ, ირაკლი კობახიძემ „ქრონიკასთან“ საუბრისას.

მისი თქმით, მმართველი გუნდი ევროკავშირში ინტეგრაციის ერთგულია და გაწევრიანების თაობაზე საქართველოს კითხვარი სათანადოდ შეივსება.

„დღის წესრიგი შეთანხმებულია, გაწერილია რეფორმების პაკეტები, კონკრეტული გადასადგმელი ნაბიჯები და რა თქმა უნდა, ჩვენ ვართ იმ პროცესის ერთგულნი, რომელსაც ევროკავშირში ინტეგრაცია ჰქვია და კონკრეტულად, ამ დღის წესრიგის ერთგულნი“, - განაცხადა ირაკლი კობახიძემ.