საქართველო ნატოს მადრიდის სამიტზე

შეხვედრაზე ძირითადი თემები იყო საქართველოს უსაფრთხოების საკითხი, ჩვენი ნატოში ინტეგრაციის საკითხი და ასევე ის რეფორმები, რომლებიც ქვეყანამ უნდა გაატაროს, რომ დაუახლოვდეს ნატოს სტანდარტს, - ამის შესახებ ნიკოლოზ სამხარაძემ ხავიერ კოლომინასა და შალვა პაპუაშვილის შეხვედრის შემდეგ განაცხადა.

საგარეო ურთიერთობათა კომიტეტის თავმჯდომარემ აღნიშნა, რომ ქართულმა მხარემ კავკასიასა და ცენტრალურ აზიაში ჩრდილოატლანტიკური ალიანსის სპეციალურ წარმომადგენელს მოუწოდა ნატომ საქართველოს ალიანსში გაწევრიანების შესახებ პოლიტიკური გადაწყვეტილება რაც შეიძლება მალე მიიღოს.

„ჩვენ ძალიან დიდი მოლოდინი გვაქვს, რომ მადრიდის სამიტზე ხელშესახები შედეგები დადგება საქართველოსთვის, იმისთვის რომ საქართველო კიდევ უფრო მეტად დაუახლოვდეს ნატოს და საბოლოო ჯამში გახდეთ ნატოს წევრი. ასევე ჩვენი მხრიდან გაჟღერდა მოთხოვნა ნატოს მიმართ, რომ ეს პოლიტიკური გადაწყვეტილება რაც შეიძლება მალე მიიღონ“, - განაცხადა სამხარაძემ.

საქართველოს პარლამენტის თავმჯდომარე შალვა პაპუაშვილი კავკასიასა და ცენტრალურ აზიაში ჩრდილოატლანტიკური ალიანსის სპეციალურ წარმომადგენელს, ხავიერ კოლომინას შეხვდა.

გაზიარება