საქართველოსთვის გაიხსნა ევროპული პერსპექტივა და ეს არის ძალიან მისასალმებელი

​მრავალი წლის განმავლობაში საქართველო ითხოვდა ევროკავშირისგან, ევროკავშირის წევრი ქვეყნებისგან, რომ დაფიქსირებულიყო ერთი სიტყვა - საქართველოს ევროპული პერსპექტივა. ეს სიტყვა არის დაფიქსირებული, შესაბამისად, საქართველოს აქვს პერსპექტივა, - ამის შესახებ საპარლამენტო უმრავლესობის წევრმა, სოზარ სუბარმა განაცხადა.

„რაც უკრაინის და მოლდოვის მიმართ არის, გასაგებია, ამ შემთხვევაში რამ გამოიწვია ეს განსხვავება. უკრაინაში არის ომი, თითქმის 50%-იანი ვარდნა აქვს უკრაინის ეკონომიკას, ყოველდღე იღუპებიან ადამიანები, ქალები, ბავშვები, იბომბება ქალაქები, სოფლები, ნადგურდება ინფრასტრუქტურა. უკრაინაში ომის გამო ასევე ძალიან მძიმე დღეშია სწორედ მოლდოვა. მოლდოვას მოსახლეობა რაც არის, იმის თითქმის ერთი მეხუთედი ლტოლვილი აფარებს თავს და უბრალოდ ორივე ქვეყანა არის ძალიან მძიმე დღეში. ამიტომ მოხდა დაჩქარება და პოლიტიკური გადაწყვეტილების მიღება, რომ მათ დღესვე მიენიჭათ კანდიდატის სტატუსი, თუმცა საქართველოსთვის გაიხსნა ევროპული პერსპექტივა და ეს არის ძალიან მისასალმებელი. რაც შეეხება რეფორმებს, რომელიც ჯერჯერობით ჩამოთვლილია ევროკომისიის წინადადებაში, ამ რეფორმებს საქართველო ისედაც ატარებდა და საქართველო ასოცირების ხელშეკრულებით ნაკისრი ვალდებულებების შესრულებით გაცილებით წინ იყო, ვიდრე მოლდოვა ან და ძალიან ბევრი ის ევროპული ქვეყანაც, რომლებიც ევროკავშირის კანდიდატი ქვეყნები არიან მრავალი წელია“, - განაცხადა სუბარმა.

ევროკომისიის პრეზიდენტმა, ურსულა ფონ დერ ლაიენმა პრესკონფერენციაზე განაცხადა, რომ რეკომენდაციას უწევეს საბჭოს, საქართველოს მიანიჭოს ევროპული პერსპექტივა და შემდეგ კანდიდატის სტატუსის მინიჭებამდე პირობების შესრულება შეფასდეს.

გაზიარება